ԼՂՀ ԱՆ նախարարն ընդունել է Իրինա Լազարյանին

ԼՂՀ առոջապահության նախարար Հարություն Քուշկյանն ընդունել է Հայաստան համահայկական հիմնադրամի ԱՄՆ արևելյան շրջանի տեղական մարմնի ղեկավար Իրինա Լազարյանին:

Նախարարը ողջունել է հյուրին, ինչպես նաև շնորհակալություն հայտնել Արցախի առողջապահությանը աջակցելու իրենց նախաձեռնությունները:

Քննարկվել են մի շարք ընթացիկ և հեռանկարային ծրագրեր: Իրինա Լազարյանը նախարարին է ներկայացրել Արցախում հեռաբժշկության զարգացման հեռանկարները, մասնավորապես Ռոստելեկոմ ընկերության աջակցությամբ հեռադասընթացների տեսագրում և պահպանում, բժշկական հաստատություններում համապատասխան սարքերի տեղադրում:

Այս ծրագրերում առաջնային են լինելու Հանրապետական բժշկական կենտրոնը, Մոր և մանկան առողջության պահպանման կենտրոնը և Արևիկ մանկական բուժմիավորումը :

Հանդիպման ընթացքում քննարկվել է նաև Մարտունու շրջանային բուժմիավորման նոր մասնաշենքի կահավորման և սարքավորումներով հագեցնելու վերաբերյալ մի շարք հարցեր: Ի.Լազարյանը նաև տեղեկացրել է, որ կշարունակվեն նաև բժիշկների կրթական ծրագրերը, վերապատրաստումները ԱՄՆ-ում:

Իսկ շտապ օգնության մեքենաների համար դեֆիբրիլյատորների տրամադրման հարցերի վերաբերյալ նախարարը ողջունել է և ներկայացրել նախարարության որդեգրած քաղաքականությունը` ներմուծել նոր ժամանակակից սարքավորումներ:

Հարցեր, պատասխաններ, մեկնաբանություններ